प्रभु लाइफ इन्स्योरेन्सको आइपीओ आज बाँडफाँड हुँदै
काठमाडौँ । प्रभु लाइफ इन्स्योरेन्स कम्पनी लिमिटेडको साधारण शेयर (आइपीओ) को बाँडफाँड आज (पौष १० गते, शुक्रबार) हुँदैछ । बिहीबार प्रि-अलोटमेण्ट सम्पन्न भइसकेको हुनाले आज शुक्रबार बिहान ११ बजे निष्काशन तथा बिक्री प्रबन्धक सिद्धार्थ क्यापिटल लिमिटेडको कार्यालय नारायणचौर, नक्साल, काठमाडौंमा बाँडफाँड गर्ने तयारी रहेको क्यापिटलले जनाएको छ ।
कम्पनीको आइपीओमा अन्तिम दिनसम्ममा १० लाख ८२ हजार एक सय ४३ जना आवेदकले २ अर्ब ९२ करोड ८७ लाख ४३ हजार रुपैयाँ बराबरको २ करोड ९२ लाख ८७ हजार ४ सय ३० कित्ताको लागि आवेदन दिएका छन् । यो सर्वसाधारणका लागि माग गरिएको भन्दा ५.४२ गुणा धेरै हो ।
यस अन्तिम तथ्यांकलाई हेर्दा न्युनतम १० कित्ताको दरले वितरण गर्दा ५ लाख ४० हजार जना आवेदकले मात्र शेयर हात पार्नेछन् भने बाँकी ५ लाख ४२ हजार १ सय ४३ जनाको हात खाली हुनेछ ।
कम्पनीले मंसिर २९ गतेदेखि यही पुस २ गतेसम्म १०० रुपैयाँ अंकित दरमा कूल ६० लाख कित्ता आईपिओको लागि आवेदन खुल्ला गरेको थियो । कूल ६० लाख कित्ता मध्ये कर्मचारी तथा म्यूचल फण्डलाई छुट्टाएर ५४ लाख कित्ता आईपिओ मात्रै सर्वसाधारणले पाउनेछन् । उक्त आईपिओ गोलाप्रथाको माध्यमबाट ५ लाख ४० हजार लगानीकर्ताले जनही १० कित्ताको दरले शेयर प्राप्त गर्नेछन् ।