विश्वमा कोरोना संक्रमणबाट एकैदिन १२ हजार ६ सय भन्दाबढीको मृत्यु

विश्वमा कोरोना संक्रमणका कारण मृत्यु हुनेको संख्या १५ लाख नाघेको छ । पछिल्लो २४ घण्टामा १२ हजार ६ सय भन्दाबढीको मृत्यु भएको छ । एकैदिन मृत्यु भएका संक्रमितको यो संख्या अहिलेसम्मकै उच्च हो । हालसम्म विश्वमा १५ लाख ११ हजार ९१५ जनाको कोरोनाका कारण मृत्यु भएको छ ।

दोस्रो लहरको संक्रमण उच्च भएको युरोपमा मात्रै पछिल्लो २४ घण्टामा ५ हजार ४८९ जनाको मृत्यु भएको छ । पछिल्लो २४ घण्टामा ६ लाख ६६ हजार ६३० जना संक्रमित थपिएका छन् ।योसंगै कुल संक्रमितको संख्या ६ करोड ५५ लाख ३६ हजार २६ पुगेको छ । संक्रमितमध्ये ४ करोड ५३ लाख ७६ हजारभन्दा बढी संक्रमणमुक्त भएका छन् ।

विश्वमा सक्रिय संक्रमितको संख्या १ करोड ८६ लाख ४७ हजार ५१३ पुगेको छ । जसमध्ये १ लाख ६ हजार ४९९ जनाको अवस्था गम्भीर रहेको वल्डोमिटरले जनाएको छ । यस्तै, पछिल्लो समय अमेरिकामा संक्रमितको संख्यामा दैनिक नयाँ रेकर्ड कायम हुंदै आएको छ । पछिल्लो २४ घण्टामा २ लाख १७ हजार ९८६ जनामा संक्रमण पुष्टि भएको छ ।

एकैदिन थपिएका संक्रमितको यो संख्या अहिलेसम्मकै उच्च हो । हाल संक्रमितको संख्या १ करोड ४५ लाख ३५ हजार १९६ पुगेको छ । संक्रमितमध्ये ८५ लाख ६१ हजार ४२७ जना संक्रमणमुक्त भएका छन् ।

भारतमा १ लाख ३९ हजार २२७ जनाको मृत्यु भएको छ । हालसम्म ९५ लाख ७१ हजारभन्दा बढी मानिस संक्रमित भएका छन् । संक्रमितमध्ये ९० लाख १६ हजारभन्दा बढी निको भएका छन् ।

ब्राजिलमा कोरोना भाइरसबाट सङ्क्रमित हुनेको संख्या ६४ लाख ८७ हजार ५१६ पुगेको छ भने १ लाख ७५ हजार ३०७ जनाको मृत्यु भएको छ । संक्रमितमध्ये ५७ लाख २५ हजार भन्दा बढी निको भएका छन् ।