राष्ट्रिय वाणिज्य बैंक र चौरजहारी नगरपालिका बीच सम्झौता
काठमाडौं । राष्ट्रिय वाणिज्य बैंक लिमिटेड र चौरजहारी नगरपालिका, रुकुम (पश्चिम) जिल्ला बीच सहुलियतपूर्ण कर्जामा सहकार्य गर्ने सम्बन्धमा सम्झौता भएको छ।
पूर्व ऊर्जामन्त्री तथा सांसद जनार्दन शर्माको उपस्थितिमा बैंकका प्रमुख कार्यकारी अधिकृत किरणकुमार श्रेष्ठ र चौरजहारी नगरपालिकाका प्रमुख विशाल शर्माले सम्झौतापत्रमा हस्ताक्षर गरेका छन् ।
नगरपालिकाले उद्यम व्यवसाय गर्न इच्छुक समूहलाई परामर्श तथा उद्यमशीलता सम्बन्धी तालिम दिने जनाएको छ। तालिम पाएका किसान वा व्यवसायीको समूह बनाएर कर्जाका लागि बैंकमा सिफारिस गर्नु पर्ने छ ।
नगरपालिकाले सिफारिस गरेका उद्यमीहरुलाई बैंकले नियमानुसार प्रत्येक समुहलाई अधिकतम दश लाख रुपैँयासम्म सहुलियपूर्ण कर्जा अन्तर्गत कर्जा लगानी गर्ने छ।
बैंकका प्रमुख कार्यकारी सिइओ श्रेष्ठले बंगलादेशबाट सुरु भएको सामूहिक जमानीको आधारमा गरिने लघुवित्त कर्जा मोडलजस्तै सहुलियतपूर्ण कर्जा नेपालको नयाँ आर्थिक मोडल बनाउनुपर्ने बताए। उनले देशको उत्पादन बृद्धि तथा गरिबी न्यूनिकरणको लागि सहुलियतपूर्ण कर्जालाई नमुनाको रुपमा लैजान सके देशलाई छिट्टै समृद्धिसँग जोड्न सकिने बताए।
राष्ट्रिय वाणिज्य बैंकले विभिन्न शीर्षकमा १ हजार ६ सय ६० जनालाई एक अर्ब २८ करोड रुपैयाँभन्दा बढी बिना धितो सहुलियतपूर्ण कर्जा दिइसकेको उनले बताए।
उक्त कार्यक्रममा सांसद ठगेन्द्र पुरी, कर्णाली प्रदेश सरकारका सल्लाहकार डा. सुरेन्द्र उप्रेती, जिल्ला समन्वय समिति रुकुम (पश्चिम)का संयोजक राजकुमार शर्मा, बैंकका उपकार्यकारी अधिकृतद्धय सरस्वती अधिकारी, देवेशप्रसाद लोहनी, विभागीय प्रमुख राज्यलक्ष्मी खड्गी, कम्पनी सचिव भोलानाथ पौडेल लगायतको उपस्थिति थियो।