माछापुच्छ्रे बैंकको स्थगित साधारणसभा पुस २ गते हुने

काठमाडौं । माछापुच्छ्रे बैंकको स्थगित वार्षिक साधारणसभा आगामी पुस २ गते हुने भएको छ । बैंकको २२औं वार्षिक साधारणसभा सो दिन बिहान ११ बजे पोखराको होटल पोखर ग्राण्डमा हुने भएको हो ।

यसअघि कम्पनीले गत कार्तिक ६ गते वार्षिक साधारणसभा गर्ने निर्णय गरेको थियो । तर उक्त समयमा कोरोना माहामारीको जोखिम अत्याधिक बढेकोले उक्त सभा स्थगित भएको थियो ।

हाल पनि कोभिड १९ महामारीको जोखिम कायमै रहेको भएपनि पुस २ गते हुने सभा भिडियो कन्फ्रेन्स मार्फत हुने र सभामा सहभागी हुन सेयरधनीलाई जुम आईडी र पासकोड उपलब्ध गराउने बैंकले जानकारी गराएको छ ।

बैंकले प्रस्तावित १०.३७ प्रतिशत लाभांश पारित गर्न सो दिन २२औं वार्षिक साधारण सभा बोलाएको हो । सभाले आर्थिक वर्ष २०७६/७७ को नाफाबाट सेयरधनीलाई ७.०३ प्रतिशत बोनस र कर प्रयोजनको लागि ३.३७ प्रतिशत नगद लाभांश वितरण गर्ने सञ्चालक समितिको प्रस्तावलाई पारित गर्ने भएको छ ।

बैंकले गत कार्तिक ६ गते सभामा जाने प्रयोजनको लागि बैंकले असोज २२ गते बुक क्लोज गरेको थियो । त्यसैले अब पुनः बुक क्लोज हुँदैन । यससँगै असोज २१ गतेसम्म कायम सेयरधनीहरू सभामा भाग लिन पाउनेका साथै, बैंकको प्रस्तावित लाभांश पाउनेछन् ।